Најмалку три лица го загубија животот, а повеќе десетици се повредени во тешка железничка несреќа што се случи во југозападна Германија. Според информациите од германските медиуми, патнички воз излетал од шините во близина на местото Ридлинген, недалеку од Штутгарт.
Железничкиот оператор „Дојче Бан“ потврди дека несреќата се случила од засега неутврдени причини, додавајќи дека инцидентот се случил околу 18:10 часот по локално време. Во моментот на несреќата, во регионот имало невреме, а некои извештаи посочуваат дека бурните временски услови можеби придонеле за трагедијата.
Во возот имало околу 100 патници, од кои најмалку два вагона излетале од шините додека се движеле низ пошумена област. Фотографиите и видеата од местото на настанот прикажуваат превртени вагони и големо присуство на итни служби. На теренот се забележани и паднати дрвја, што дополнително го отежнува пристапот до повредените.
„Дојче Бан“ информираше дека возот сообраќал на линијата меѓу Зигмаринген и Улм, долга околу 90 километри.
„Во моментов, точните околности на несреќата сè уште се истражуваат. Нашите мисли се со жртвите и нивните семејства, како и со сите кои беа вклучени или сведоци на овој трагичен настан“, стои во соопштението од компанијата.
Истражните органи и службите за спасување продолжуваат со работата на терен, а сообраќајот на дел од железничката мрежа е привремено во прекин.