Претседателот на Собранието, Африм Гаши, денеска најави дека со посебен закон просторот околу законодавниот дом ќе биде прогласен за безбедносна зона. Овој потег, како што појасни, е надвор од тековните безбедносни реформи и новото независно обезбедување во рамки на Собранието.
Новото законско решение предвидува сериозни ограничувања во одреден радиус околу Собранието. Меѓу нив се: целосна забрана за одржување јавни собири, протести и манифестации, како и летање со дронови и други беспилотни летала. Исто така, ќе се забрани каква било градба или поставување инфраструктура во дефинираната безбедносна зона.
Согласно член 8 од предлог-законот, се предвидува:
-
Забрана за градежни работи;
-
Забрана за поставување инсталации и линии на инфраструктура;
-
Забрана за јавни собири, протести и манифестации;
-
Забрана за летање со дронови над Собранието и безбедносната зона.
Законот исто така предвидува поништување на сите веќе издадени дозволи за градба во оваа зона, како и раскинување на постојните договори за користење на државно земјиште во дефинираниот безбедносен појас.
Покрај претседателот Гаши, предлогот е поддржан и од пратениците Беким Коку, Блерим Беџети, Борислав Крмов, Весна Бендевска, Никола Мицевски и Оливер Спасовски. Законот ќе биде разгледуван од собраниската Комисија за одбрана и безбедност.
Иницијативата доаѓа во време на политички турбуленции и засилена активност на протести, што веќе предизвика реакции од јавноста и граѓанскиот сектор поради стравувања од ограничување на уставно загарантираните граѓански права.