Русија најави планови за воведување на бесплатна вакцина против рак базирана на mRNA технологија, која ќе биде достапна за сите граѓани до крајот на оваа година. Како што соопштува руското Министерство за здравство, вакцината е наменета да го зајакне имунолошкиот одговор и да го потисне растот на туморите, јавува државната новинска агенција ТАСС.
Според надлежните, иновативната вакцина ќе му овозможи на организмот полесно да ги препознае и неутрализира канцерогените клетки, што претставува чекор кон поефикасно справување со болеста. Развојот на оваа терапија е резултат на соработка меѓу неколку научни и истражувачки институции во земјата.
Иако проектот претставува значителен напредок во примената на mRNA технологијата надвор од полето на заразни болести, засега не се објавени детални информации за типот на рак што ќе биде таргетиран, ниту за резултатите од клиничките испитувања.
Ваквата иницијатива на Русија доаѓа во момент кога и други држави, како САД, Велика Британија и Германија, интензивно работат на развој на mRNA терапии за онколошки заболувања. Истовремено, водечки фармацевтски компании како Moderna и Merck веќе тестираат слични вакцини.
И покрај оптимизмот, експертската јавност предупредува дека се потребни дополнителни докази за ефикасноста и безбедноста на вакцината. Доколку ваквите терапии се покажат како успешни, тие би можеле радикално да го променат пристапот кон лекувањето на рак на глобално ниво, обезбедувајќи поцелна и индивидуализирана терапија за пациентите.