Спијат во болница, одбиваат да јадат: Лекарите од Нови Сад за состојбата на семејствата чии најблиски се борат за живот

 

Итните екипи на Клиничкиот центар „Војводина“ продолжуваат да се борат за животот на три тешко повредени лица по падот на настрешницата на Железничката станица во Нови Сад, изјави д-р Весна Туркулов, в.д. директор на оваа здравствена установа. Повредените се во критична состојба, а лекарите постојано ги набљудуваат и прават сè што е во нивна моќ за да им го спасат животот.

„Пациентите сè уште се нестабилни, и нивните животи се во опасност. Можам да кажам дека немаше никакви хируршки интервенции во текот на претходната ноќ, но сите тројца се во многу тешка состојба и не се свесни,“ изјави д-р Туркулов во програмата „Уранак“ на телевизија К1.

Таа додаде дека семејствата на повредените добиваат поддршка на секој можен начин. Бидејќи не се од Нови Сад, изнајмиле станови под кирија, но претежно остануваат во фоајето на Клиничкиот центар, сакајќи да бидат блиску. „Тоа е најмалку што можеме да направиме за нив,“ рече Туркулов.

„Поради нивниот подолг престој овде, им даваме психолошка поддршка и разговараме со нив, но ситуацијата е навистина тешка. Надзорот се врши 24 часа. Во оваа ситуација сите дежурни екипи се засилени. Сите бдееме над нив и се бориме. Секојдневно сме во контакт со министерот за здравство и добиваме сета потребна поддршка,“ додаде д-р Туркулов.

Таа рече дека семејствата на повредените ги посетил и градоначалникот на Нови Сад, Милан Ѓуриќ, кој организирал дополнителна поддршка за нив.

„Тоа е најмалку што може градот да направи. Сите сме тука да помогнеме. Ние, здравствените работници, се бориме овде, додека тие се борат на нивните фронтови,“ истакна Туркулов, нагласувајќи дека бројот на загинати и повредени е согласно со официјалното соопштение.

„Во моментов имаме тројца тешко повредени, додека 14 лица загинаа на лице место. Нема полесно повредени,“ заклучи д-р Туркулов.

„Вакви повреди немаме видено од војната,“ изјави д-р Драган Николиќ. Лекарите секогаш очекуваат најлошото, но Николиќ се надева дека со толку добар тим овие пациенти ќе бидат добро.

„Најтешката работа е кога откриваме дека нешто не оди како што треба. Сите имаме огромна желба тоа да биде добро. Најважно е да го вложиме целото наше знаење. За нас ова е голем предизвик да ги спасиме овие луѓе. Прогнозите се неповолни, но со ваков труд, се надевам на добар исход,“ вели д-р Николиќ.

Тој посочи дека покрај медицинската умешност, многу е важна и хуманоста во овие моменти што ја покажуваат лекарите.

„Родителите на една од пациентките не излегуваат од Ургентниот центар. Една медицинска сестра ми кажа дека таткото на пациентката не ја остава 24 часа и одбива да јаде. Сите се собравме да му понудиме помош и поддршка. Нам ни е потребна емпатија, желба за хуманост. Професионализмот е важен, но хуманоста е исто толку значајна. Ако сите сочувствуваме, тогаш на тие луѓе и на нас ќе ни биде полесно,“ изјави д-р Николиќ за РТС.